Tras-scríbhinn: Pleananna, Líníochtaí, Doiciméid
Céard iad na doiciméid a chaithfidh mé leagan isteach?
Seo a leanas aistriúchán ar thras-scríbhinn an fhíseáin. Tá an bunleagan Béarla ar fáil anseo.
Braitheann na doiciméid a theastaíonn i gcomhair iarratais ar chead pleanála ar an gcineál forbartha atá i gceist. Ní mór dóibh a thaispeáint, go soiléir is go sonrach, na moltaí atá agat don fhorbairt, an chuma a bheidh ar an bhforbairt agus í críochnaithe, agus an chaoi a réiteoidh sí leis an láithreán, le foirgnimh agus réadmhaoin thadhlacha srl. Tá seans ann go mbeidh ort torthaí an phoill tástála agus na dtrialacha síothlaithe a chur faoi iamh má bhíonn tú chun umar seipteach a chur isteach. Chun cead a fháil i gcomhair cineálacha áirithe forbartha talmhaíochta, seans go mbeidh ort conartha maidir le leathadh eisilteach a leagadh isteach atá sínithe le húinéirí talún. Tig leis an údarás pleanála tuilleadh eolais i leith na ndoiciméad agus na sonraí a bhíonn ag teastáil a thabhairt duit.
De ghnáth, ámh, ní mór duit an méid a leanas a leagan isteach:
- Leathanach an nuachtáin ar a foilsíodh an fógra;
- Cóip den fhógra láithreáin a cuireadh in airde;
- 6 chóip de léarscáil de shuíomh an láthreáin (ar scála nach lú ná 1:1000 i gcás limistéar faoi fhoirgnimh, agus nach lú ná 1:2500 i gcás gach ceantair eile)
- Plean ar a dtaispeántar an áit bheacht ar an láithreán ar a cuireadh an fógra láithreáin in airde.
- 6 chóip de phlean leagan amach an láithreáin (ar scála nach lú ná 1:500 é).
Ní mór an scála méadrach a úsáid ar gach léarscáil.
Má bhaineann an fhorbairt le struchtúr faoi chosaint nó le himeachtar foirgnimh a luíonn laistigh de cheantar caomhnaithe ailtireachta, ní mór grianghraif, pleananna agus sonraí eile a leagan isteach a léireofar an tionchar a bheidh ag an bhforbairt ar charachtar an struchtúir.
Céard ba chóir a léiriú ar léarscáil de shuíomh an láithreáin?
Ní mór na nithe a leanas a léiriú ar léarscáil de shuíomh an láithreáin:
- An talamh atá i gceist agus láithreán na bhfoirgneamh molta, mar aon le teorainn an tsuíomh léirithe i ndath dearg.
- Imeall aon talaimh eile máguaird atá faoi úinéireacht an iarratasóra nó an uinéara talún léirithe i ndath gorm, agus imeall na gceadanna slí léirithe i ndath buí.
- Uimhir bhileoige na léarscáile de chuid na Suirbhéireachta Ordnáis.
- Pointe an tuaiscirt a bheith léirithe ar an léarscáil
- Ainm agus seoladh an duine a d’ullmhaigh iad
Céard ba chóir a léiriú ar phlean an tsuímh nó ar phlean dá leagan amach?
Ní mór na nithe a leanas a bheith léirithe ar phlean suímh nó ar phlean leagtha amach:
- Teorainn an tsuímh a bheith léirithe i ndath dearg
- Foirgnimh atá ann cheana, bóithre, teorainneacha, umair sheipteacha agus limistéir síothlaithe, tobair thollta, clampaí móra crann, agus aon sainghnéithe eile atá tadhlach nó gar don talamh nó foirgneamh atá i gceist (ar scála nach lú na 1:500 é).
- Léibhéil nó comhrianta na talún agus an fhoirgnimh mholta, má a bhaineann sé le hábhar.
- Uimhir bhileoige na Suirbhéireachta Ordnáis má bhaineann sé le hábhar
- Pointe an tuaiscirt a bheith léirithe ar an léarscáil
- Ainm agus seoladh an duine a d’ullmhaigh iad
Céard faoi bhonnchlónna agus líníochtaí eile?
Ní mór do bhonnchlónna agus líníochtaí eile cloí leis an méid a leanas:
- Ní bheidh bonnchlónna, ingearchlónna ná gearrthacha ar scála níos lú na 1:200 (mura bhfuil scála eile faofa ag an údarás pleanála)
- Ní mór na príomhghnéithe d’aon fhoirgneamh atá tadhlach leis an bhfoirgneamh molta a bheith léirithe ar aon líniocht nó ingearhcló den fhoirgneamh molta ar scála nach lú na 1:200
- Ní mór aon mholtaí i gcomhair atógáil, athrú nó síneadh a bheith marcáilte go sonrach chun go mbeifear in ann iad a aithint thar fhoirgnimh atá ann cheana.
- Ní mór na príomhthoisí (airde iomlán san áireamh) a léiriú i bhfoirm figiúirí ar aon bhonnchlónna, ingearchlónna agus gearrthacha de na foirgnimh mholta.
- Ní mór pointe an tuaiscirt a léiriú ar na léarscáileanna ar fad
- Léireofar uimhir bhileoige na Suirbhéireachta Ordnáis nuair a bhaineann sé le hábhar
- Tabharfar le fios ainm agus seoladh an duine a d’ullmhaigh na bonnchlónna agus na líníochtaí.