Seirbhísí: Uisce agus Séarachas

Panoramic View of Achill Sound Waste Water Treatment Plant
Ionad Cóireála Séarachais Ghob an Choire

Seirbhís Uisce agus Séarachais

Tá se de rún ag Comhairle Contae Mhaigh Eo a chinntiú i gcónaí le linn na bliana 2011 go ndéantar uisce óil den chéad scoth a sholáthar agus fuíolluisce den chaighdeán is airde a scaoileadh isteach in ár gcuid uiscebhealaí arís, agus go gcloífear i gcónaí leis an lear mór rialacha náisiúnta agus eorpacha.

Beidh tionchar nach beag ag na dualgais dhochraideacha a leagadh ar Chomhairle Contae Mhaigh Eo faoin bprionsabal íoc mar a thruaillítear – prionsabal a chuireann iallach ar an gComhairle 30% ar an meán de chostas caipitil na bpríomhscéimeanna a sheasamh – ar cumas na Comhairle spriocanna Chlár Infheistíochta na Seirbhísí Uisce a bhaint amach.

Fuair Comhairle Contae Mhaigh Eo €6.20m ar iasacht in 2010 chun gealltanais i leith infheistíocht chapitiúil ar scéimeanna séarachais i gCaisleán an Bharraigh, Béal an Átha, Gob an Choire, agus Coillte Mach a chomhlíonadh.

Gearrfar muirir breise ar fiú €800,000 iad ar na hiasachtaí sin, agus ní fhágann sé an dara rogha ag Comhairle Contae Mhaigh Eo ach muirir uisce a mhéadú 10% in 2011.

Seo a leanas na muirir a ghearrfar in 2011:

	2011	2010
Uisce	€0.97/ méadar ciúbach	€0.91
Fuíolluisce	€1.43/ méadar ciúbach	€1.35
Táille Sheasta	€125	€125

Caighdeán Uisce

Caighdeán Fuíolluisce

Caiteachas Eile

Bearta Leasúcháin agus Scéimeanna a ndearna an GCC iniúchadh orthu

Tionscadal Caomhnaithe Uisce an Chontae

Bainistiú Fuinnimh

Bainistiú Acmhainní

Méadrú Uisce/Muirir Uisce

An Coiste um Beartais Straitéiseacha maidir le Soláthar Uisce agus Séarachas

Caighdeán Uisce

Tá sé ríthábhachtach go mbíonn muinín ag an bpobal i gcoitinne as an uisce a sholáthraíonn Comhairle Contae Mhaigh Eo.

Is chuige sin atá Comhairle Contae Mhaigh Eo ag forbairt córas bainistíochta caighdeán uisce a thógfaidh na gnéithe a leanas ar fad san áireamh: cosaint foinse, bainistiú riosca na soláthairtí, caighdeán uisce a thástáil agus na torthaí a fhoilsiú, agus pleananna bainistíochta teagmhais a fhorbairt dár gcuid soláthairtí ar fad.

Beidh torthaí tástálacha ar chaighdeán uisce ar fáil i gcónaí le linn 2011 ar leathanach idirlín Caighdeán Uisce na Comhairle.

Déanann Feidhmeannacht na Seirbhíse Sláinte, chomh maith le saotharlanna príobháideacha údaraithe eile, tástáil ar sholáthairtí uisce ar bhonn neamhspleách do Chomhairle Contae Mhaigh Eo. Bíonn an córas tástála seo faoi réir ag clár monatóireachta atá faofa ag an nGníomhaireacht um Chaomhnú Comhshaoil (GCC).

Bíonn an mhonatóireacht seo á déanamh ar bhonn leanúnach, agus cuirtear béim speisialta ar mhonatóireacht cripteaspóiridiam. Leanfaidh Comhairle Contae Mhaigh Eo ar aghaidh ag obair i gcomhar leis an GCC agus le Feidhmeannacht na Seirbhíse Sláinte maidir le monatóireacht leanúnach ar na soláthairtí uisce.

Barr

Caighdeán Fuíolluisce

De réir reachtaíochta a cuireadh i bhfeidhm sa bhliain 2007, ní mór do Chomhairle Contae Mhaigh Eo ceadúnais a fháil ón GCC do na hionaid cóireála fuíolluisce ar fad atá againn, agus tá an próiseas seo ag dul ar aghaidh ar bhonn leanúnach.

Is coinníoll de chuid na gceadúnas a eisíodh go dtí seo é go gcuirfear Clár Feasachta agus Cumarsáide Poiblí ar bun, chun é a chur ar shúile an phobail go bhfuil eolas ar cheadúnais ar fáil le scrúdú ag an bpobal.
Tá an t-eolas seo ar fáil ag an nasc a leanas: Caighdeán Fuíolluisce

Ceadúnais Scairdte Fuíolluisce

Is é stádas reatha an phróisis iarratais:

Acmhainn an Ionaid Cóireála Fuíolluisce (coibhéis áitritheora)	Iarratais ar Cheadúnais Scairdte Fuíolluisce leagtha isteach	Líon na gCeadúnas/ dTeastas ceadaithe go dtí seo
Breis is 10,000	3	3 Cheadúnas
2,001 go 10,000	10	2 Cheadúnas
1,001 go 2,000	8	2 Cheadúnas
500 go 1,000	12	3 Cheadúnas
Níos lú ná 500	12	12 Theastas

Ghearr an GCC táillí iarratais ar fiú €616,000 iad ar Chomhairle Contae Mhaigh eo as an 33 cheadúnas agus 12 theastas seo.

Meastar go n-íocfar €43,526 mar ranníocaíocht bhliantúil don GCC in 2012 i dtaobh an 10 gceadúnas a eisíodh go Comhairle Contae Mhaigh Eo.

Tá iomlán na sonraí maidir le hIarratais ar Cheadúnais nó Teastais Scairdte Fuíolluisce (WWDA) agus faoi na ceadúnais agus teastais a eisíodh cheana féin ar fáil ar shuíomh idirlín an GCC, www.epa.ie.

Barr

Caiteachas Eile

Tá sé socraithe sa Bhuiséad don bhliain 2011 go bhfaighidh scéimeanna nua nó scéimeanna méadaithe na costais chothabhála atá ag dul dóibh.
Is iad seo a leanas na príomh-mhéadaithe atá socraithe don bhliain 2011:

Oibreacha Cóireala Fuíolluisce Chaisleán an Bharraigh
Uasghrádú agus leathnú na scéime chun freastal ar riachtanais fhad-téarmacha Chaisleán an Bharraigh agus an ceantar máguaird chomh fada le 2020 agus ina dhiaidh. Conradh deartha, tógála agus feidhmithe is ea seo.
Tá an scéim seo ag teacht chun críche faoi láthair.
Scéim Séarachais Ghob an Choire
Tá an scéim seo ag teacht chun críche faoi láthair (Samhain 2010). Tá bainistíocht agus cothabháil an ionaid clúdaithe faoi scéim deartha, tógála agus feidhmithe.
Scéim Séarachais Bhéal an Átha, Cuid 2
Tá an scéim seo ag teacht chun críche faoi láthair. Tá na costais cothabhála a ghabhann leis an scéim curtha san áireamh i mbuiséad na bliana 2011.
Ionad Cóireála Fuíolluisce Choillte Mach
Beidh an scéim seo i bhfeidhm in 2011, agus beidh costais cothabhála i gceist ó 2011 ar aghaidh.

Barr

Liosta Leasúcháin agus Scéimeanna Iniúchta ag an GCC

Mar chuid den ról maoirseachta atá ag an nGníomhaireacht um Chaomhnú Comhsaoil faoi na Rialacháin um Uisce Óil (2007), rinne siad iniúchadh ar thrí cinn de sholáthairtí poiblí uisce i Maigh Eo in 2010.

Rinne an GCC líon na soláthairtí poiblí uisce ar an Liosta Leasúcháin aige a ghiorrú ó 13 go 11 in 2010.

Bíonn breis costais i gceist le hoibreacha ar scéimeanna ar an Liosta Leasúcháin le riachtanais an GCC a chomhlíonadh.

Barr

Tionscadal Caomhnaithe Uisce an Chontae

Críochnaíodh Cuid 1 den tionscadal seo sa bhliain 2007. Cuireadh tús le Cuid 2 in 2009 agus meastar go gcosnóidh sé €2.80 milliún.

Sa chuid seo, déanfar uisce a chaomhnú ar na scéimeanna soláthair uisce atá fágtha sa chontae, Scéim Soláthair Uisce Réigiúnach Loch Measca go príomha.

Tá méid suntasach uisce sábháilte againn cheana féin. Tá Cuid 3 d’oibreacha – lena n-áirítear oibreacha athshlánaithe go léir – le tosú in 2011.

I measc na n-oibreacha seo beidh tionscnamh príomhphíobáin aníos Fhoirriú i mBéal an Átha.

Barr

Bainistiú Fuinnimh

Rinne Comhairle Contae Mhaigh Eo iarratas ar thairiscintí le haghaidh an tsoláthair mhéadraithe leictreachais chuig na hionaid cóireála, agus bronnadh an conradh ar Energia ar feadh tréimhse 12 mhí ó 01 Meitheamh 2010 go dtí 31 Bealtaine 2011.

De bharr léirscaoileadh an mhargaidh, agus toisc nach bhfuil monaplacht ag ESB Customer Supply ar sholáthar leictreachais sa tír a thuilleadh, thapaigh Comhairle Contae Mhaigh Eo an deis buntáiste a bhaint as margadh atá níos dinimiciúla agus níos iomaíche agus d’aistrigh siad breis is 250 cuntas ó Bhord Soláthair an Leictreachais go dtí ár soláthraí nua, Energia.

Sábháladh méid suntasach airgid – tuairim is €300,000 – ar ár gcuntais mhéadraithe mar thoradh air seo.

Íocfaidh Comhairle Contae Mhaigh Eo €112,000 sa bhreis in aghaidh na bliana ar chuntais mhéadraithe leictreachais uile de bharr an tobhaigh oibleagáide seirbhíse poiblí (tobhach PSO) a chuir an Coimisiún um Rialáil Fuinnimh i bhfeidhm ar 1 Deireadh Fómhair 2010.

Déantar monatóireacht agus measúnaithe ar chuntais mhéadraithe leictreachais ar bhonn rialta. Déanfar iarracht i gcónaí airgead a shábháil agus barr éifeachta a bhaint amach trí mheasúnú a dhéanamh ar thomhaltas fuinnimh agus trí chuntais a aistriú go taraifí eile lena chinntiú go bhfaigheann an Chomhairle an luach is fearr.

Barr

Bainistiú Acmhainní

Tuigtear go bhfuil sé ríthábhachtach go bhfeidhmíonn na hionaid cóireála atá againn go seasmhach agus go leanúnach chun seirbhísí riachtanacha uisce agus séarachais a sholáthar. Is dá bhrí sin atá clár cuimsitheach cothabhála coiscthí i bhfeidhm ag Comhairle Contae Mhaigh Eo, chomh maith le obair riachtanach chothabhála i gcás cliseadh.

Déantar an obair chothabhála coiscthí seo sula gcliseann an t-innealra. Socraítear an obair roimh ré agus déantar go rialta é.

Mar chuid den chóras cothabhála réamh-mheastach seo, nó córas monatóireachta bhail an innealra, ní mór gnéithe éagsúla d’fheidhmiú an fhearais a thomhais – creathadh nó teocht mar shampla.

Buailtear aláram má shroicheann an t-innealra léibhéil áirithe réamhshocraithe, múchtar é, agus tugtar deis obair chothabhála a dhéanamh air.

Is trí Chlós Innealra na Comhairle a sholáthraítear an tseirbhís seo.

Barr

Méadrú Uisce / Muirir Uisce

Ba é 2008 an chéad bhliain ar gearradh muirir uisce agus shéarachais ar bhonn toirtmhéadrach ar chustaiméirí gnó.

Tá méadair uisce ag 98% de chustaiméirí gnó faoi láthair, agus beidh an chuid eile díobh méadraithe faoi dheireadh 2011.

Tá custaiméirí nua á bhfáil chomh maith agus grúpscéimeanna uisce ar fud an chontae á gcur faoi chúram na Comhairle Contae.

Cuireadh oifig ar leith ar bun sa bhliain 2008 chun déileáil go sonrach le Muirir ar Sheirbhísí Uisce agus le caomhnú uisce.

Déanann an oifig seo 2,000 bille a phróiseáil in aghaidh na míosa faoi láthair.

Tig le custaiméirí a gcuid Muirear ar Sheirbhísí Uisce a íoc in aon oifig de chuid Chomhairle Contae Mhaigh Eo, nó é a íoc ar líne, áit ar féidir leo súil a choinneáil ar an méid uisce a bhíonn á úsáid acu chomh maith.

Ní mór muirir uisce a mhéadú 10% in 2011.

Déanfaidh an Chomhairle athbhreithniú ar an lamháltas 225 méadar ciúbach uisce in aghaidh na bliana a thugtar do chustaiméirí tí.

Barr

Coiste um Beartais Straitéiseacha maidir le Soláthar Uisce agus Séarachas.

Ina mbaill den Choiste seo tá:

Clr. E. Lavin
Clr. J. O'Malley
Clr. R. Conway
Clr. T. Connolly
Clr. John O'Malley
Clr. A. F. O'Malley
Clr. B. Gavin
An tUas. J. O'Malley
An tUas. B. O'Mahoney
Lucy Weir Bingham, Uas.
An tUas. R. Gilboy

Tionóladh cruinnithe na bliana 2010 ar 22 Aibreán, 30 Iúil, agus 21 Deireadh Fómhair 2010.

I measc na gceisteanna a raibh faoi chaibidil ag an gCoiste bhí Clár Infheistíochta na Seirbhísí Uisce, Ceadúnais Fuíolluisce, Beartas Uisce Tuaithe, agus Bailiúchán Muirir Uisce.

Barr